PAULO GENA TALOTALO FILEMONA GENA

Filemona vega-matagaina kilara

Paulo na epepa Roma tipura numana na etaloato Filemona gena. Epepa rigolo 60 e 61 vekarawarai etaloato, Iesu ekwaregato mulinai.

Epepa ganina kamuna “Vegapirage-wai”. Golea kamura epepa aonai golea 15 e 16.

Paulo na Filemona epepa etalo-veniato kwalana gena ririwa,

1) Filemona pene vaikilaa, Onesima mapene gapi-ragea vewalakava magulinai;2) Filemona pene vega-ripaa, ia tipura na roli elakatina, pene laka-piati tomanai ia Filemona pene laka-gita.Paulo na epepa Filemona gena evetaina ewareato:1. Paulo na Filemona evega-rageato - tenu 1-72. Paulo na Onesima aranai Filemona enogiato - tenu 8-213. Vevega-neka kilara ekilagirato - tenu 22-25

Philemon

1Au Paulo, Iesu Keriso galamanai tipurai ataluna talimaku, e walakavara Timoteo, gemana ewatina.

Inagulu kwapuna gakalaana talimana e gatamai namana Filemona atalo-venimuna. 2Walawalara Afia, e gatara namana, Palagu gena vetali aonai Palagura kavarai, Akipas, e goi na numai gotanu-kouna ekalesiara atalo-venirana.

3Tamara Palagu e Velekou Iesu Keriso geriana maino e vetuga gemi ai pene mia.

Filemona gena ulamagi e kamonagi

4Filemona, geku Palagu atanikiu-veniana e vanagivanagi geku rapali ai akilagimuna, 5kwalana gemu kamonagi Velekou Iesu genai e gemu ulamagi Palagu gena veaga talimara maparara geriai akamonagimuna gaurai. 6Gaura pakurai arapalina gemu kamonagi pono varavaragia talima reketa geriai, pe gau namara tagaunarana Keriso genai takamonagina vetainai, pono ripa-namanamara. 7Taunatauna, walakavaku, gemu ulamagi na evega-verere- rakavakuto e evega-nagi-rakavakuto, kwalana goi na veaga talimara aora ovega-tiligarato.

Paulo gena noginogi

8Au aoku makwalimuna Keriso aonai goi para vaikilamu rakagau poro kala, 9na ulamagi aonaimo anogimuna gemu ulamagi pakunai. E au, Paulo, pavelepara e Keriso Iesu galamanai tipurai ea. 10Onesimo, au natuku, pakunai anogimuna. Ia Keriso aonai au natuku ai eagoto, kwalana au roe ea tipura numana aonai, palagura kavarai ia tamanai aagoto. 11Kunenai ia ati nama goi gemu ai, na ewagumona vetugunagi ago-venirai ia gelegele, goi na oririwaana e au na maki aririwaana.

12Ia au nugaku garakaunai, atugu-waikuleana, pe pono gapi- ragea. 13Au geku ririwa ia enai pana gapi-gaugaua au lagaku ai, pe goi kapumu pene gapia au pere veakavaku, au Vali Namana galamanai tipurai roe ea aonai. 14Na geku ririwa goi na rorirori poro veniku vou para gapi-gaugaua, vovetaina gaurai ati agapi- gaugauato. Au maki ati aririwana goi pana vaikilamu rakagau pono kala. Au geku tugamagi, pene kala namara reketa au veakavaku ulanana pono ririwa kalakalara genai, maaomu maparana na, pono kalara.

15Peiramu goi gemuna Onesimo egerevagito toma reketa ganina, mapono gapi-waikulea genai, goi goti pio talu-vanagivanagi ulanana. 16Ati gemu inagula talimana ati voina talimanamo. Aikina. Taunatauna, ia gemu inagulu talimana ati voina talimana, na ia ewagumona goi walakavamu taunataunanai pene ago, gaurai pono ulamagia. Au na ia agitatago-gitakauana maaoku maparana na, e goi na maki pono ulamagi iwavagia maaomu maparana na. Ia pono ulamagia e pono gapi-ragea talima ta e Velekou aonai walakava ta.

17Pene au ogapi-ragekuna goi gatamu, Onesimo maki pono gapi-ragea au pono gapi-rageku vetaina. 18Pene kepi ta ekalaato goi gemu ai pa magena gapitore goi gemu ai genai, au araku ai pono talora. 19Au Paulo gimaku na epepa ataloana. Vogapitore voira maparara pana veni-waikulemu. Goi maki magemu gapitore au geku ai. Goi maguli au gekuna orawaliato, na neira ati pita kilagira. 20Pe, walakavaku Velekou aonai, gemu kala geku noginogi pono gapi-ragea. Ita taura ruala Keriso aonai tamagulina, pe pono vega-verereku.

21Gemu maguli galewanai averaramanina gaurai patalo-venimu. Au ripaku, ati anogimuna kalaramo pono kalara, na kala namara polura maki pono kalara. 22Makwauta ea, geku maitu kovogana ta pono kala-maavua, kwalana atugamagina, Palagu na gemi rapali pene gapi-ragea, pe pene vaiwatiku gemi ai.

Vevega-nama kilara

23Epaparas, Keriso Iesu galamanai au ria tipura numanai gataluna, ia na evega-namamuna. 24E Mareko, Aristakas, Demas e Luka au ria gainagulu-kouna talimara, ira na maki geria vevega- nama gevenimuna.

25Velekou Iesu Keriso gena vega-nama maparami gemi ai pene mia.